Asturies declaró-y oficialmente la guerra a Napoleón pola invasión francesa d’España.
La Xunta Xeneral foi la institución asturiana que, nes dependencies de la Catedral d’Uviéu, asumió la soberanía, porque’l Rei Fernando VII taba reteníu en Francia, ensin opción a reaccionar.
La Xunta constituyóse en Xunta revolucionaria.
Decidió unviar comisionaos al Reinu Uníu y d’esta manera internacionalizar el conflictu. Ésta yera la única forma de ganar. Amás, propunxo que se conformaren Xuntes Patriótiques en toles provincies.
El 25 de mayu de 1808 el pueblu asturianu, al traviés de la Xunta, púnxose al frente de la situación.
Ye un finxu históricu que ye menester recordar y poner en valor. La toupoderosa Francia de Napoleón atopó n’Asturies la primer oposición formal a la so invasión.
Estos fechos foron mui relevantes políticamente.
Asturies foi la primera en tomar midíes empobinaes a asumir la soberanía polos ciudadanos, que de dalguna manera dexaron de ser súbditos.
La Xunta Xeneral tresfórmase en Soberana y foi exemplu a siguir por otres, incluyendo la Xunta Suprema Gubernativa del Reinu.
Amás, adelantó munchos principios recoyíos na Constitución de Cádiz de 1812, la Pepa, la primer Constitución española y onde tuvieron participación relevante los asturianos.
El 25 de mayu foi de dalguna manera la revolución política más significativa d’Asturies.
Por delles razones:
Foi una reacción contra una agresión esterior, anque ésta nun se diere entá n’Asturies.
Punxo en valor la solidaridá nacional y l’asunción de soberanía.
Implicó’l cambéu del réxime antiguu a la "modernidá". L’Asturies histórica, anque marxinal territorialmente, muestra la so vitalidá política. Adelantó la revolución dientro la guerra y dio entrada a idees del constitucionalismu lliberal.
Xovellanos en 1794…
Catorce años primero qu’españara la guerra de la Independencia, escribió una carta razonada pal Marqués de Camposagrado onde definía cómo había ser según la historia la bandera y escudu del Principáu d’Asturies:
La Cruz de la Victoria col alfa griega nel brazu derechu y l’omega nel izquierdu.
L’escudu tenía de tener corona real.
El lema: HOC SIGNU TUETUR PIUS. HOC SIGNU VINCITUR INIMICUS. [Con esti signu protéxese al piadosu, con esti signu véncese al enemigu].
El fondu habría ser azul ensin escartar la posibilidá del encarnáu.
Años depués…
En mayu de 1808 l’exércitu asturianu, formáu pa defendese énte’l todopoderosu Napoleón, atopóse con que nun tenía una enseña que lu representara.
Aquelles tropes, pa definir cuál sería la so enseña, tomaron como referencia les indicaciones que Xovellanos redactara unos años atrás, precisamente pa un reximientu militar.
Pue dicise que pela primer vez empezó a utilizase l’actual bandera asturiana por un exércitu proyectáu de 20.000 efectivos qu’asumió en tierra asturiana la soberanía nacional p’aguantar al invasor francés y defender la independencia y llibertá de la nación.
